لملم جراحك يا وطن

لملم جراحك يا وطن لسه طريقنا طويــــل
الجرح مش راح يدوم ما دُمت فيك الحيــل
طول ما دراعك عفى وفيك جمال الــروح
شمسك هاتطلع يوماتى فوق شطوط النيــل
......
لملم جراحك وهات ايدك معايا وقـــــــــوم
دا احنا انتصرنا يادوب فايت عليه كام يـوم
لسه الصبايا يا دوب بيفرقوا الشربــــــــات
والشمس لسه هاتطلع بين ضباب وغيــــوم
......
لملم جراحك ولم زبالة الأيـــــــــــــــــــــام
خلى طريقنا جميل لسه الأمل قـــــــــــــدام
كوم الزباله كبير لكن ها نقضى عليـــــــــــه
ونعيش بقيت عمرنا فى نور وخير وســـلام
......
مفيش فى زمن النضال حلاوة من غير نــار
لازم تكون يا وطن وقت الآلام صبـــــــــــار
ياما اتجرحنا كتير ودوينا ياما جــــــــــروح
ووقعنا ياما وقومنا نكمل المشـــــــــــــــــوار
......
هانت وفاضل على بلوغ الأمل شبريـــــــــن
واحنا كتبنا التاريخ بأيدينا من ساعتيــــــــــن
مدام استجاب القدر لإرادة الثـــــــــــــــــــوار
قوم يا وطن وابتسم وافرح مع الملاييـــــــــن
......

هز الهلال يا وطن واطلع لزمن النـــــــــــور
دار الزمان دورته واحنا علينا الــــــــــــــدور
نفرح ونبنى ونعلا لفوق كمان وكمــــــــــــان
ونلبس اللى ظلمنا و زلنا طرطــــــــــــــــــور
......