طوابيرك يا بلادى

طويلة طوابيرك يا بلادى من العجوزة للمعــادى
كل أزمه نقول دى عدت جات أنابيبها السنادى
واقفة ناس طول النهار ناقصة تشحت بالأيادى
ست حامل خايفة تولد واللى سايبة رضيع ينادى
واللى حاله يا خوى معطل واللى قال سابنى معادى
واللى غايب من وظيفته عشانها خدناها اعتيادى
نفسى ألقى أى خدمة من غير عذاب أقصى مرادى
ولا َّشىء مكتوب علينا؟! والطابور لينا ازديادى
واللى واخد فوق نصيبه لا هامه جدى ولا دادى
أنابيبه توصل حد بيـته وسعادته قاعد جوا نادى
بالكوسه يا با يمشى حالك ننسى المبادئ كله عادى
ولاّ الطابور رمز التلاحم؟! والمرور راح يبقى هادى
طوابير لغاز طوابير لعيش مش لاقى وقت أكفى زادى
دا الدعم شىء ملموس حقيقى لحمة وعلاج كافيار زبادى
لو جبنا أنبوبة تزغرد بنت الحلال تسعد فؤادى
جوزى جاب أنبوبه يامَه وجات الجيران هنت ولادى
واللى قال جابها بواسطة واللى قال ساكن قصادى
كان صبور طول الطابور استنى دوره غاظ الأعادى
طابورنا طويل حادى بادى من العجوزة للمعــــادى