"أنا ثور فرعون"

أنا ثور فَرعون هايج مجنون
جرحونى وعصروا علىَّ لَمون
فكونى ورشوا فى عينى صابون
وأنا ثور متغمى بقالى قرون وطلع لى قرون
مربوط فى طاحونة وأنا المطحون
لأنا قادر أطبق فيها قانون
ولا قادر أطاطى وأعيش مدفون
مانا ثور فَرعون
ملعون الزمن اللى عَمَانى وبقيت مغمور
وتغور العيشة اللى تخلى المالك مجبور والتاج طرطور
صراصير الأرض بتـتــنطـط على ظهر نمور
وتغور العيشة اللى تخلى المارد مذعـور واعى ومخمور
وزباين إبليس بالجزمة واقفين فى الزور
يتلم المحصول وأتعاير بالأرض البور
أنا ثور مقهور.. نط من السور آم لفحه النور
ماعرفشى الكحك من البيتى فور
ماعرفشى العُـرف من الدُستور

على طول معذور حمَّـال وصبور
أغفر وأنا عارف بالمستور
وألزَّق فى البيض المكسور
وألِّم الدور وف لحظة أثور
الاقينى لسان وبيان وساطور
ولا ميت ميتادور (مصارع الثيران)
يقدر يصارعنى وأنا المنصور
مِن إمتى الحق يصارعه الزور؟
أنا ثور مغرور

أنا ثور معلوف
بضمير وثقافة أدب وقطوف
حَطوا لى عليقِـت كدب وخوف
حكمونى وهُمَّا علىَّ ضيوف
غَمُّونى وقالوا سلامة الشوف
غَمُّونى بكدب وزيف مكشوف
لا حيا ولا كسوف
بصيت فى مرايتى لاقيت حلُّوف
لأنا عارف مُنكر من معروف
ولا عارف خرطوش من مولوتوف
بايت زهقان صابح مأروف
بوعود وقرار وكلام ملفوف
وكأن الطبخة الجاية خروف
الدعوة تروح لحيتان وجلوف
فين التنتوف؟
اسمك محذوف
وحروف بتنط وتمحى حروف
أنا ثور مخسوف

أنا ثور نطاح بمزاج مداح
أنا كف صنايعى وفاس فلاح
أنا نبت الطين أنا حَـبْ لقاح
حدفتنى رياح
حطيت على أرض قانون إصلاح
جُم رشقوا فى قلبى سهام ورماح
أنا ثور مجروح بسبع ترواح
أنا جن مصوَّر مش بارتاح
كان عهد وراح وكابوس وانزاح
مش حاحلم تانى وأطير بجناح
ولا حارحَم مجرم ولا سفاح
أنا ثور نطاح

فكيت من حلمى لاقيتنى باثور
وشجاع وجسور
بصيت فى مرايتى لاقيت ديناصور
بيهد السور بيلم النور ومانيش مبهور

أمسح فى مرايتى ألاقى طيور والفن سما والعلم بحور
أمسح فى مرايتى ألاقى فُـطور من بعد سنين مذلول فى طابور
وألاقى شعور مافيهوش أنانية وظلم وجور
وألاقى الساقية جابولها ماتور
أترحم على عبد المأمور
أمسح فى مرايتى ألاقى بذور
بترعرع وبتلحم فى جذور تنشر فى عطور
وترجع لى العمر المبتور
تكتب لى سطور من غير محذور
أمسح فى مرايتى ألاقى أُمور!

أسأل فى الخلق وألِّـف وأدور
باللاهى عليك كان فيه هنا ثو !!؟